牧女 - 索南昂秀

词：藏韵

曲：才让多杰

原唱：索南昂秀

上传人：念藏仁青

录音师：周强加

拍摄：昂多

༡. ལུག་ཁྱུ་རི་ལ་བཀྲམ་ཡོད། །

རྫི་གཞས་ངག་ལ་བཀུག་ཡོད། །

སྨན་ཆུང་ལུག་རྫི་བུ་མོ། །

དྲན་པའི་ཡིད་ལ་འཁོར་ཡོད། །

ནོར་ཁྱུ་ལྷས་ན་སྐོར་ཡོད། །

འབྲི་མོ་རྡང་ལ་བཏགས་ཡོད། །

གཤིས་འཇམ་འབྲོག་རུའི་བུ་མོའི། །

བཞོ་དབྱངས་ངག་ལ་བཀུག་ཡོད། །

༢. འདོ་བ་རྟ་ཕོ་ཞོན་ཡོད། །

མགོ་དཀྲིས་གློ་དམར་དཀྲིས་ཡོད། །

ཚར་དཀར་གོང་བའི་ཁ་ནས། །

འཛུམ་ཆུང་མེ་ཏོག་བཞད་ཡོད། །

ཆར་ཆུ་མོད་པོའི་ནང་ལ། །

ཕྱིང་གོས་ལུས་ལྭ་གྱོན་ཡོད། །

ལྕི་ཟེའུ་རྒྱབ་ལ་ཁུར་ནས། །

རྐང་རྗེས་ལྷས་ལ་ཕབ་ཡོད། །

༣. ཐང་སྨུག་སྦྲ་ཆོན་བར་ནས། །

མཐུ་སྣེ་ལག་ལ་འཛིན་ཞིང་། །

མིག་ཟུང་རྒྱང་ལ་ཅེར་ནས། །

ཞེ་འདང་ལོ་ཟླར་བྲིས་ཡོད། །

ལག་ལ་འུར་ཆ་བཟུང་ཡོད། །

ཕྱུགས་ཟོག་རི་ནས་བསྐྱངས་ཡོད། །

མར་ཆུར་སྣོད་ལ་བསོགས་ནས། །

འཁོར་བ་ཐབས་ཀྱིས་བསྐྱངས་ཡོད། །

༤. ལག་ལ་ལས་དཀའ་འཛོམས་ཡོད། །

ཁྲེལ་ལ་ཕྱི་ཐག་ལྡན་ཡོད། །

མགོ་སྦྲ་སྨུག་པོའི་ནང་འཛིན། །

འབྲོག་རུའི་བུ་མོ་ཡིན་རེད། །

ཁ་འབྲས་ཡིད་དུ་འོང་བ། །

དམ་ཚིག་བརྩི་ཞིང་སྲུང་བ། །

ཁྲེལ་ལ་ཕྱི་ཐག་ལྡན་པའི།

འབྲོག་ཐང་འབྲོག་མོ་དྲན་ཡོང་། །